Tímamót urðu í gámaflutningum hér á landi í dag en þá kom til landsins 40 feta gámur á vegum TVG-Zimsen sem farið hafði með lest alla leið frá Chengdu í Kína til Rotterdam. Þaðan kom hann til Íslands með skipi sem kom til hafnar í Reykjavík í gær.

Þetta kemur fram í tilkynningu frá TVG-Zimsen.

„Þetta er fyrsti heilgámurinn sem fluttur er með lest frá Kína gegnum Rotterdam og til Íslands. Þessi lestartenging er nýjung fyrir flutningaheiminn og sparar um það bil helminginn af flutningstíma frá Asíu til Evrópu miðað við sjófrakt, en er þó töluvert ódýrari en flugfrakt alla leið til Íslands,“ er haft eftir Raffaele Manna, yfirmanni umboðsmannakerfis TVG-Zimsen.

Gámurinn fór af stað frá Kína 12. maí og kom til Rotterdam um mánaðamótin.

„Gámurinn var svo settur í skip til Íslands fyrir viku þannig að hann var um þrjár vikur á leiðinni,“ segir Manna.

Traust flutningsleið
Lestartengingin mun vera hluti af nýrri stefnu kínverskra stjórnvalda til að tengjast stórum hluta heimsins betur, í þeim tilgangi að efla viðskipti og samskipti og stuðla að meiri hagvexti.

„Lestartengingin er traust flutningsleið einnig vegna þess að hefðbundnu flutningaleiðir frá Kína geta verið óstöðugar. Til dæmis gerist það reglulega að fraktflug frá Kína til Evrópu er yfirbókað og þá er annaðhvort að borga hærra flutningsgjald, eða bíða eftir að pláss losni. Þá má einnig nefna að lestarferð frá Kína til Evrópu er umhverfisvænni flutningamáti en flug og skip,“ segir Manna.

Þá bætir hann við að TVG-Zimsen bjóði upp á lestarsamgöngur milli Kína og Rotterdam bæði fyrir heilgáma og lausavöru.

„Þessi lausn er hluti af þeim metnaði TVG-Zimsen að bjóða framsæknar flutningalausnir fyrir íslensk fyrirtæki. Lestin tengist öllum helstu höfnum í Kína, en við erum að vinna í að tengja þetta einnig við Hong Kong og Taívan. Það má því með sanni segja að nú sé Kína enn nær Íslandi.“

Fréttir

{{ article.title }}